جمبري, مكرونة بالجمبري, و سمك فيليه من غير قلي و كمان بتنجان..♥DOU♥

جمبري, مكرونة بالجمبري, و سمك فيليه من غير قلي و كمان بتنجان..♥DOU♥

♥DOU♥

السلام عليكم يا بنات

انا قلت ميصحش ابقي رايحة جاية علي اقسام الطبخ و ماحطش التاتش بتاعي فيها
فقررت اشارككم باحدث إختراعاتي المطبخية

من كام يوم طلبت معايا سي فود و بما ان انا و الجمبري واخدين بعض عن حب قررت اعمل جمبري
عملت جمبري بقشره, و مكرونة بالجمبري و الوايت صوص و عملت سمك فيليه عشان ماما بتحبه بس بطريقة مختلفة شوية

انا بعمل كميات صغيرة عشان احنا في البيت 3 بس و مش بناكل كتير فعملت من كل حاجة نص كيلو علي قد اكلة

اول حاجة الجمبري,

ده اول ما جبته و غسلته كويس بالملح و الليمون و سيبته منقوع فيهم

و دي الحاجات اللي هنحطها مع الجمبري عشان تديله طعم حلو (طماطم-بصل-فلفل اخضر-ثوم)
المفروض يكون معاها جزر بس انا نسيته 

هنحط شوية زيت صغيرين في الحلة و ننزل الاول البصل و بعدين الفلفل و اول ما يبدا لونهم يتغير ننزل التوم و لما ريحته تطلع ننزل الطماطم و بعدين نحط التوابل (انا حطيت كمون و ملح و فلفل بس عشان الجمبري اصلا طعمه قوي و مش بحب التوابل تغطي علي طعمه)

و بعد ما نقلب التوابل علي الخضار ننزل الجمبري و نقلبه لحد ما ياخد تان 
و بعد كدا نحطله كوباية مية و نغطيه, هو في العادي مش بحطله مية و بسيبه يستوي مع نفسه بس انا كنت عايزة منه شوربة كتير عشان المكرونة

ندخل بقي علي المكرونة

ده الجمبري النونو بتاع المكرونة و بردو غسلته كويس و بعدين طلع عيني حبة حلوين لحد ما طلعت الكيس الرملي الي في ضهرة عشان ميكونش زفر و بعدين غسلته بالملح و الليمون و نقعته

اول حاجة جيبت حتة زبدة صغيرة و حطيت فيها شوية توم و اول ما ريحتهم طلعت نزلت عليهم الجمبري النونو و كل ده في حلة كبيرة لان دي اللي هنسلق فيها المكرونة و حطيت عليه رشة ملح و كمون

و لما ريحته طلعت و بدا يستوي و ينزل مية شيلته من الحلة من غير المية بتاعته و حطيته في طاسة تيفال عشان يتشوح بقي

طيب و المية بتاعته؟ المية دي خدتها حطيتها في الهون اللي دقيت فيه التوم هتقولولي ايه العك ده, هقولكم احلي حاجة في الاكل اللخبطة دي, المية بتاعت الجمبري هتاخد من طعم التوم و انا عايزة المية يبقي فيها طعم قوي

بعد كدا في نفس الحلة الغلبانة اياها هنجيب كام جمبرياية بقشرهم من اللي كنا بنسلقهم و نحطهم يتشوحوا

اول ما نحطهم و نشم ريحة الجمبري ننزل علي طول المكرونة معاه, و نفضل بقي بلاد تشيلهم و بلاد تحطهم, نشوحهم مع الجمبري عشان ياخدوا من طعمه و ريحته و بعدين نشيل الجمبري من الحلة نرجعة معزز مكرم لموطنه الاصلي مع اخواته الجمبريات التانيين

بعد كدا,هنروح واخدين مية الجمبري اللي في الهون حاطينها علي المكرونة و نحط عليها الشوربة بتاعت الجمبري اللي كنت بقولكم عايزاها عشان المكرونة

انتوا عارفين ان المكرونة اصلا صعب تاخد طعم لوحدها عشان كدة كنت عايزة اسلقها في مية كلها طعم, شوية من الجمبري الصغير و شوية من الجمبري الكبير و شوية توم و شوية من الخضار اللي كان مع الجمبري, ده غير اننا شوحناها مع جمبري و ده خلاها خدت طعم و ريحة حلوين

هنسيب المكرونة تستوي و نشوح الجمبري الصغير و خدوا بالكوا انه لو استوي قوي يا اما هيتهري يا اما هيبقي زي الرابر كدة بيشد فبلاش ننشفه قوي

و بعدين نبدأ نعمل الصوص بتاع المكرونة, هو زي البشاميل بالظبط بنسيح زبدة او سمنة و نحط فيها دقيق بس بدل ما يبقي كله لبن هنحط (شوية لبن-شوية لبن رايب-شوية شوربة جمبري)
و علي قد الدقيق اللي هتعمليه بقي, انا عن نفسي مش بعمل بمقادير معينة ممشياها بالسنس كدة, بحط 3 معالق دقيق و افضل ازود لحد ما الاقي الصوص بقي مظبوط و خفيف انا نسيت اصور البشاميل لوحده بس بعد ما خلصته حطيت عليه الجمبري النونو و قلبتهم مع بعض علي النار شوية و بعدين طفيت عليه

و بعدين لما المكرونة تتسلق و نصفيها هنحطها في صينية و نحطل عليها الصوص بالجمبري,

و كدة شكلها مش عاطفي خالص عشان كدة حطيت عليها شوية موتزاريللا و دختلها الفرن تتحمر من فوق بس نسيت اصورهالكم, المهم انها في الاخر كان طعمها تحفة بس اللي بيعملوا دايت يمتنعون لان دي عامرة بكل مخربات الدايت زبدة و صوص و موتزاريللا و حاجات تودي ورا الشمس 

بس بما ان ماما بتعمل دايت و كان نفسها في السمك فقولت اخلي عندي دم و اعملهولها من غير زيت و قلية
انا اول ما جبت السمك الفيلية غسلته كويس و بعدين تبلته بتوم و ليمون و ملح و كمون و كزبرة و اي توابل سمك تحبوها

و بعدين خرجته و في طاسة تيفال حطيت نقطة زيت صغيرة بس المهم الطاسة تكون تيفال كويس عشان السمك ميلزقش
و خدوا بالكوا ان السمك بيستوي بسرعة و لحمه بيتهري فبلاش نقلبه كتير

و بعدين نخرجه علي منديل او نحط تحتيه بقدونس عشان لو فيه اي زيت ينزل منه

كدة خلاص, الجمبري اتعمل, المكرونة دخلناها الفرن تتحمر من فوق, و السمك اتعمل

فاضل معاهم البتنجان السينييه بتاعي  كل ما بنبقي معزومين او عازمين حد بيطلبوه مني

هحطه في المشاركة الجاية

تعليق واحد

fatakat

البتنجان بقي, هنجيب بتنجاناية كيوت كدة و نقطعها مش شرايح لأ مكعبات متوسطة

و الفلفلكذلك هنقطعه مكعبات و لو هتعملي فلفل حامي يبقي سليم طبعا مش متقطع

و البتنجان قبل ما نقليه بنحطه في مصفاة و عليه شوية ملح عشان يخرج المية اللي جواه و بكدة ميشربش زيت كتير
و بعدين نقليهم في زيت سخن و اول ما نخرجهم من الزيت نرش عليهم خل و نسيبهم يتصفوا,

و بعدين نروح نحضر التتبيلة
الاول ندق تومة و معاها شوية ملح صغيرين و كمون

و بعدين نقطع طماطماية

و التكة بقي, بحط علي الطماطم دي شوية بابريكا و رشة نعناع و توابل هندي, هتلاقوها بتتباع في اي سوبر ماركت كبير, بيبقي فيها توابل عجيبة كدة بتخلي طعم الاكل حلو

و بعدين نحط عليهم التومة و نعصر ليمونة

و بعدين نحطالبتنجان و الفلفل علي التتبيلة و نقلبهم كويس

بس كدا خلصت, نشكر حسن استماعكم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *